Востоличен новиот Кумановско-осоговски Митрополит

Во Соборниот Храм „Свети Николај Чудотворец“ во Куманово, денеска беше отслужена Света Божествена литургија на која беше хиротонисан епископот сарандопорски архимандритот Григориј, игуменот на осоговскиот манастир за епархиски архијереј на кумановско-осоговската епархија. На хиротонијата присуствуваа архиепископот Охридски и Македонски г.г. Стефан и архијерејите на МПЦ-ОА, монаси и верници од државата.
Синодот на МПЦ-ОА на седница на 21 мај годинава го избра епископот сарадопорски Григориј за митрополит на кумановско-осоговската епархија.

Архиепископот Охридски и Македонски г.г. Стефан во обраќањето се осврна и на работата на досегашниот митрополит г. Јосиф, укажувајќи дека двајцата подолго време биле заедно и во монаштвото и во дејствувањето во епархијата.

– Колку што епископското служење е добро и колку што е големо толку е и тешко. Ако е тешко да се биде под власт многу потешко е да началствуваш, советува свети Григориј Богослов и колку си поголем толку повеќе биди и понизен за да најдеш милост пред Господа.-кажа меѓу другото г.г. Стефан.

За епископ додава, потребни се и мудрост, трпение, кроткост, одаденост и постојаност во верата, надежта, љубовта. Тој го повика како востоличен ариереј да направи достојни дела, да го проповеда словото, службата да ја исполнува добро.

– Какви и да се времињата и потребите кои ги притискаат луѓето, проповедта на црквата секогаш е проповед на покајанието и враќањето при Бога. Па затоа сè што ќе работиш и говориш посведочувај дека Црквата е изградена и се гради и со жртва и со љубов и дека секој архијереј и секој свештенослужители се должни постојано да искажуваат благодарност со која ќе му служиме на Бога, благоугодно, со почит и со страв-рече г.г. Стефан.

Епископот, додава во говорот, треба да е трезвен, воздржлив. Тој се осврна и на потребата од поука за евангелската вистина насекаде, укажувајќи дека и по 20 столетија христијанство во Македонија сè уште жетвата е голема, а работници се малку.

– Образование во верата е потребно за сите генерации. Но во недостаток на вистинска можност, младите да се запознаат со еванглеските вистини уште во училишните години и тоа од образовани кадри во таа област, како и безможноста за Бога и за Црквата да се каже и прикаже во медиумите светите храмови ни остануваат да ни бидат единствени училници-рече г.г Стефан и го повика архиерејот кој има високи научни звања да се потруди да најде соодветни начини за поучување на Христовата наука. Тој го повика новиот митрополит да помогне во зачувувањето на единството и помеѓу архијереј, свештенослужителите, народот.

– Постојано посочувај ги пораките за тоа, колку е убаво, па и потребно браќата да живеат сложно, затоа и дека во ова наше време како никогаш досега ни треба слога меѓу браќата и љубов меѓу ближните, како и за тоа конечно да сфатиме до каде може да не однесе и што може да ни донесе нашето национално неединство-вели г.г. Стефан.

Митрополитот на кумановско-осоговската епархија, г. Григориј дека нема поголема чест отколку да се служи на Бога, укажувајќи дека е многу важно народот да присуствува на литургиите, да учествуваат, да се причествуваат. Македонскиот народ, рече ја живее полнотата на христијанскиот живот, македонската православна црква е пример за здраворастечко тело кое своите членови ги развива во богоподрживaчко единство со православните народи.

Во современата духовна дезориентираност која владее во светот, рече митрополитот, потребно е да се создаваат можности за луѓето тие да се сретнат со вистинскиот Бог.

– Свесни сме дека принципот на секуларност се повеќе станува клучна детерминанта во нашето општество и во нашиот живот и во односите меѓу црквата и државата. И го цениме религиозниот плурализам, но не смееме да дозволиме да се заборава или пак да се потценува историската вистина и примарното место и важност на националното, културното и духовното наследство, чувано, збогатувано и пренесувано од православната црква од Македонија. Вредностите што сме ги наследиле со православното предание не се само културни споменици од духовното минато, туку се залог и гарант за иднината на православниот народ, а со него и на нашата држава-рече г. Григориј.

Тој повика на зачувување на христијанскиот идентитет и вредности.

Братството на Свештената Бигорска Обител, предводено од својот старец и игумен, Епископ г. Партениј, му честита на новохиротонисаниот Митрополит Кумановско-осоговски г. Григориј, посакувајќи му благотворна пастирска дејност, крепко здравје и Божјо просветление.
На многаја лета, Владико!

Превземено од: https://bigorski.org.mk/vesti/nastani/vostolichen-noviot-kumanovsko-osogovski-mitropolit/