Cвети архангел Михаил во с. Јегуновце-Тетовско

21.11.2024 На празникот собор на св. арх. Михаил во храмот св. арх. Михаил во с. Јегуновце-Тетовско, митрополитот Тетовско-гостиварски г.Јосиф ги благослови кумските лебови. Како и секоја година црковниот одбор подготви трпеза на љубовта на која беа поканети сите присутни. Митрополитот г.Јосиф обраќајќи се на присутните на храмовата слава истакна: Денеска нашата света Црква го прославува Соборот на светите ангели и архангели, на чело со свети архангел Михаил. Самиот празник нè поттикнува да размислуваме за бестелесниот и невидливиот свет.
Затоа, ние, во нашите молитви, покрај тоа што бараме помош од Господа Христа и од Пречистата и Приснодева Марија, исто така, со молитви се обраќаме и кон нашиот ангел чувар, како и кон останатите небесни сили. Им се молиме да нѐ пазат, да нѐ чуваат и да ни помагаат во нашиот христијански пат кон Царството небесно. Денешниот празник е особен ден за вас жителите на Јегуновце кои имате изградено храм на Архангел Михаил. Од Вашето многубројно денешно присуство во храмот се гледа колкава е Вашата почит и љубов кон Архангел Михаил. Оние коишто сте кумови оваа година, Господ нека ви подари милост, благодат, мир во вашите семејства. Чест и радост ми е што сум овде денеска со вас во Јегуновце. Да се помолиме на Светиот Архангел Михаил и на сите Небесни Сили, за и ние да заживееме ангелски живот, во името на Отецот, и Синот, и Светиот Дух.
Честит нека е празникот и кумствата и честито нека е името на оние што го носат името на светиот архангел Михаил". По молитвите и застапништвото на светите ангели, Бог нека ја услиши нашата молитва. Така нека биде. Амин!